O‘zbekiston turizm sohasida yirik islohotlarni amalga oshirib, global miqyosda jozibador yo‘nalishlardan biriga aylanmoqda. Mamlakatga tashrif buyurayotgan xorijiy va mahalliy sayyohlar sonining ortishi esa oʻz navbatida mehmonxonalar sonining ham yildan-yilga ortib borishiga zamin yaratadi. Biroq, ushbu o‘sish jarayoni nafaqat mehmonlarga qulay sharoit yaratish, balki ekologik muvozanatni saqlash bilan ham uyg‘unlashishi zarur. Hozirgi kunda jahon tajribasi shuni ko‘rsatmoqdaki, yashil hududlarga ega mehmonxonalar nafaqat atrof-muhitga ijobiy ta’sir ko‘rsatadi, balki sayyohlar orasida ham yanada ommalashadi. Shu bois, mehmonxonalarda "yashil infratuzilmani" rivojlantirish O‘zbekiston turizm strategiyasining muhim yo‘nalishlaridan biri bo‘lishi lozim. 

Quyida mehmonxonalarda yashil hududlarni kengaytirish bo‘yicha amaliy tavsiyalar keltirilgan.

1. Yashil hududlarni barqaror saqlash uchun mahalliy iqlimga mos, suvni kam talab qiluvchi o‘simliklardan foydalanish zarur. Bu:

- Suvni tejash imkonini beradi.

- O‘zbekistonning tabiiy landshaftiga mos muhit yaratadi.

- Hududiy bioxilma-xillikni qo‘llab-quvvatlaydi.

2. Mehmonxonalar maydonidan samarali foydalanish maqsadida:

- Devorlarga vertikal bog‘larni o‘rnatish.

- Tom qismlarini yashil maydonga aylantirish.

Bunday yechimlar shahar muhitida kislorod miqdorini oshirish bilan birga, mehmonxonaning dizaynini yanada jozibador qiladi.

3. Ichki makonlarni yanada qulay qilish uchun:

- Mehmonxona lobbilari va restoranlarida yopiq bog‘lar tashkil etish.

- Yashil devorlar orqali estetik muhit yaratish.

Bu nafaqat ichki muhitni go‘zal va sokin holga keltiradi, balki mehmonlarga tabiat bilan uyg‘unlik hissini ham taqdim etadi.

4. Suvni tejash va yashil hududlarni samarali saqlash uchun tomchilab sug‘orish tizimidan foydalanish tavsiya etiladi. Bu:

- Sug‘orish jarayonidagi suv isrofini kamaytiradi.

- O‘simliklarning tabiiy o‘sish jarayonini qo‘llab-quvvatlaydi.

- Ekologik va iqtisodiy jihatdan samarali hisoblanadi.

5. Mehmonxonalarda ekologik chiqindilarni qayta ishlash tizimini yo‘lga qo‘yish zarur. Bunga:

- Organik chiqindilarni kompostlash va yashil hududlar uchun tabiiy o‘g‘it sifatida foydalanish.

- Plastik va qog‘oz chiqindilarni alohida yig‘ib, qayta ishlash.

Bu nafaqat ekologik muhitni yaxshilash, balki mehmonlar orasida ekologik madaniyatni oshirishga xizmat qiladi.

6. Yashil hududlarni yoritish va suv favvoralarini ishlatishda quyosh panellaridan foydalanish. Ushbu tashabbus orqali:

- Elektr energiyasini tejash.

- Atmosferaga zararli chiqindilar ajralishini kamaytirish.

- Mehmonxonalarning energiya mustaqilligini oshirish mumkin.

7. Mehmonlar orasida ekologik madaniyatni oshirish:

- Yashil turizm bo‘yicha maxsus bannerlar, elektron materiallar va video taqdimotlar joylashtirish.

O‘zbekiston yashil turizmni rivojlantirish yo‘lida muhim qadamlarni tashlamoqda. Mehmonxonalarda yashil hududlarni kengaytirish ekologik barqarorlikni ta’minlash, sayyohlar uchun qulay muhit yaratish va global turizm standartlariga moslashish imkonini beradi. Ushbu tavsiyalar mamlakatning turizm sektorini yanada jozibador qilish bilan birga, uning ekologik kelajagini ham mustahkamlashga xizmat qiladi.