Aholining doimiy daromad manbalarini shakllantirish davlat siyosatining ustuvor yo‘nalishlaridandir. Turizm esa bu borada muhim manba hisoblanadi.

Oqdaryo tumanidagi “Kumushkent” mahalla fuqarolar yig‘inida sut mahsulotlarini ishlab chiqarish bo‘yicha o‘z kichik biznesini tashkil etishga qaror qilgan xotin-qizlarning tashabbusi Turizm va madaniy meros boshqarmasi tomonidan qo‘llab-quvvatlandi.
– Tadbirkorligimizni endi boshlayapmiz, – deydi ushbu mahallada yashovchi Nigina Hamroqulova. – Bir necha xotin-qizlar maslahatlashib, sigirlarimiz beradigan sutni emas, chiroyli qadoqlangan tayyor mahsulotlarni sotish biz uchun foydaliroq, degan qarorga keldik. Mahsulotlarimiz hajmi hali kichik bo‘lgani uchun uni shahardagi do‘konlarga yetkazib berish qiyinroq boʻldi. Shunda turizm boshqarmasi bizlarni qo'llab-quvvatladi va qoʻzacha qatiqlarimizni sotishga yordam berib kelmoqda.
Shaxsiy biznes, pul ishlashdan tashqari, ayollarga o'z ishlarini va vaqtlarini rejalashtirish imkoniyatini bermoqda.