Joriy yilning 4-9-may kunlari turizm sohasi vakillaridan iborat Samarqand viloyati delegatsiyasi Koreya Respublikasida xizmat safarida bo’lib turibdi. Safar davomida Seul hamda Gyeongju shaharlarida “Samarqand – Yangi O’zbekistonning turizm darvozasi” targ’ibot kompaniyasi tashkil etilishi hamda Seoul International Travel Fair turizm ko’rgazmasida ishtirok etishi, shuningdek Samarqandning gastronomik turizm salohiyati targ’iboti yuzasidan tadbirlar o’tkazilishi rejalashtirilgan.

Xizmat safarining ilk kunida O‘zbekiston Respublikasining Koreya Respublikasidagi elchixonasida “Samarqand – Yangi O’zbekistonning turizm darvozasi” targ’ibot tadbiri o’tkazildi. Tadbirda turizm sohasida faoliyat yuritayotgan Koreyaning biznes vakillari, oliy ta’lim muassasalari professor-o’qituvchilari hamda koreyalik ommaviy axborot vositalari vakillari ishtirok etishdi.

Tadbir doirasida Samarqand viloyati turizm salohiyati, transport-logistika tizimida sayyohlar uchun yaratilgan imkoniyatlar hamda turizm sohasida kadrlarni tayyorlash yuzasidan “Ipak yo’li” turizm va madaniy meros xalqaro universitetida yaratilgan shart-sharoitlar, turistik kompaniyalari tomonidan yangi turizm mahsulotlari to’g’risida taqdimotlar tashkil etildi.